Urteari amaiera emateko, bertso saioa

Urteko azken bertso saioa ospatu zuen atzo, hilak 30, Durangoko Plateruena Antzokian, urteroko tradizioarekin bat eginez. Berbaro elkarteak antolatuta, lau izan ziren oholtza gainean izandako bertsolariak: Maialen Lujanbio, Jon Maia, Eneko Abasolo Abarkas eta Amets Arzallus. Unai Iturriaga gai jartzaile paperean ibili zen eta, urtero legez, ez zen falta izan agurtzear gauden urtearen errepasoa, beti bezala, umorea erabiliz. Itxura ederra erakutsi zuen Durangoko Kafe Antzokiak, urteko azken bertso saioaz gozatzeko.
Ikusi aurtengo bideoa

Iazko bertso saioa:

Europak bizi duen hotzaldiak eragina izan du Euskal Herriko hegaldietan

Europa erdiak azken egunetan bizi duen hotzaldi bortitzak eragina zuzena izan du Euskal Herriko  aireportu nagusian, Loiun. Hamar hegalaldi ezeztatu dituzte bertan, Frankfurt, Parisetik eta Londresetik zetozenak hain zuzen ere. Azken honetan bizi da egoerarik okerrena. Heartrow,  hiriko aireportu nagusia eta Europan trafiko gehien jasotzen duena itxita dago atzotik, eta oso gutxi dira bertatik irtetzen diren hegazkinak. 

Antzeko egoera bizi da Alemaniako Frankfurten. Holandan, Bruselan edota Frantzian, arinago baina okerra da ere egoera, eta hainbat hegalaldi bertan behera utzi behar izan dituzte. Europako kaosak eragina du noski Madridko Barajas eta Bartzelonako Prat aireportutan, atzerapen eta ezeztapenekin. 

Iruñean, Gasteiz eta Donostiako aireportuetan, ordea, ez da arazorik egon eta oraingoz, normaltasuna da nagusi. 

Iñaki Aleman bertsolari gazteak irabazi zuen Mariano Izeta bertso sariketa

 Iñaki Aleman bertsolari iruritarrak irabazi zuen iragan asteazkenean, hilak 8, Nafarroako Bertsozale Elkarteak antolatutako Mariano Izeta bertso sariketa. Bi urtetan behin egiten den sariketa honen helburu nagusia Nafarroako bertsolari gazteak bultzatzea eta ezagutzera eramatea da. Aurtengo edizioan 13 bertsolari gaztek hartu zuten parte eta denen artean irabazle suertatu zen Aleman. Horren ostean, Saioa Alkaiza antsoaindarra eta Josu Sanjurjo lesakarra izan ziren bigarren eta hirugarren, hurrenez hurren. 

Payadoreak, repentistak eta bertsolariak plazaz plaza

Inprobisazioak munduan itxura ezberdinak hartzen dituela erakusteko, Alex Diaz Pimienta repentista kubatarra Aguiar anaien musikaz lagunduta eta Mariela Acevedo eta Gabriel Luceno payadore uruguaitarrak alde batetik bestera ibili dira Euskal Herrian zehar, beti bi bertsolarik lagunduta. 

Iruñeko kasuan, Julio Soto eta Amets Arzallus izan zituzten lagun oholtza gainean, hiriko Gurutze Plazako institutuko aretoan burututako saio umoretsuan. Hona bideoa: 

Amets Arzallus txapeldun Zarauzko Kopla Txapelketan

Amets Arzallusek eraman zuen atzo Zarautzko IV.Kopla Txapelketako zintzarria, iazko txapeldunari, Julio Soto gorritiarrari buruz burukoan irabazita. Lepo bete zen Zarauzko Putzuzulo gaztetxea eta aurreko edizioetan bezala, jende ugari geratu zen ezin sartu. 

Giro ederrean ospatu zen txapelketa, eta maila onean erantzun zituzten hamar bertsolariek koplan kantatzeko jarritako gai umoretsuak. Hamar horietatik sei sailkatu zituen publikoak hasiera batean, Jone Uria, Miren Amuriza, Sebastian Lizaso, Amets Arzallus, Julio Soto eta Miren Artetxe, hain zuzen. Geroxeago, Amets Arzallus eta Julio Soto pasa ziren buruz burukora, berriro ere, publikoak hala aukeratuta. Hendaiarra izan zen nagusi azken txanpan, eta txapelketako sari den zintzarria eraman zuen berarekin. 


Azken agurren bideoa (bertsoa.com)

Iazko txapelketako une bat:

Dena prest Bizkaiko Txapelketako finalerako

Datorren larunbatean, hilak 18, izango da 2010ko Bizkaiko Bertsolari Txapelketako final handia. Oholtza gainean, aurreko saioak gaindituta sailkatutako zortzi bertsolariak: Miren Amuriza, Onintza Enbeita, Etxaun Lekue, Arkaitz Estiballes, Peio Ormazabal, Ione Uria, Beñat Ugartetxea eta Eneko Abasolo Abarkas. Parean, plaza erraldoia, Barakaldoko BEC aretoa. Dagoeneko sarrerak salgai daude, eta ziur asko, itxura ederra erakutsiko du areto barakaldarrak, aurtengo txapelketa zeinek jantzi ikusteko.

Gazteok eta bizi ereduak

Pista anitzeko edizioa eta irrati era berrituak ikasgaian soinuak erabiliz komunikatzeko erronka jarri ziguten. Guk hausnarketa txiki eta esperimental bat egin nahi izan genuen, egungo sistemak gazteoi bizi eredu jakin bat nola inposatzen digun salatu nahian. Goizean esnatu eta irratia pizten duenetik sistemaren bonbardaketa jasaten duen gaztearen istorioa duzu hau, zure istorio izan daiteken bera, edozein gazterena. Entzun ezazu! 
Gazteok eta bizi eredua

Amaitu da Iruñeko Bertsoaroa

Nafarroako Bertsozale Elkarteak antolatuta, amaierara iritsi da urteroko Bertsoaroa zikloko edizio berria. Hilabetean zehar, egitarau oparoa jaso du Iruñeko Gurutze Plazako institutuko areto nagusiak, musika emanaldi bat eta hiru bertso saio bilduz. Urriaren 21ean hasi zen Bertsoaroa, Joseba Tapiaren musika errezitaldi batekin. Hortik aurrera, ostegunero izan da bertso saio bat. Lehenbizikoan, urriaren 28an, Saioa Alkaiza, Aitzol Barandiaran, Aimar Karrika, Alaia Martin, Iñaki Aleman eta Agin Rezola bertsolari gazteak ibili ziren kantari. Bigarrenean, azaroaren 4ean, Amets Arzallus, Estitxu Arozena, Jon Maia, Aitor Mendiluze, Xabier Legarreta eta Unai Iturriaga ibili ziren bertsotan. Iragan ostegunean, beste sei bertsolarik eman zioten amaiera aurtengo edizioari, jende andana bilduz: Maialen Lujanbio, Julio Soto, Sustrai Colina, Oskar Estanga, Aitor Sarriegi eta Andoni Egaña.

Hona hemen bigarren saioko une bateko bideoa, Bertsoa.com webgunetik hartuta.

Soinuak komunikazio tresna gisa

Pista anitzeko edizioa eta irrati era berrituak izeneko irakasgaian Audacity software askea erabiliz istorio bat sortzeko erronka hartu genuen, eta baita lortu ere. Hona hemen gure taldearen azken produktua, gazteria eta harreman sexualetarako ereduak edota matxismoa uztartzen dituena, dena, soinu hutsak erabiliz. Entzun ezazue! 




Bortxaketa by keikrass

Miren Amuriza nagusi Igorreko saioan

Miren Amuriza izan zen nagusi iragan igandean Igorren jokatutako Bizkaiko Txapelketako saioan.446.5 puntu jasota hartu zituen mendean gainerako bost bertsolariak - Eneko Abasolo, Peio Ormazabal, Joanes Igeregi, Ortzi Garitano eta Beñat Vidal - eta bertsolari berriztarra zuzenean sartu da txapelketako finalaurretan. 500dik gora ikuslek bete zuten Arratiako herriko kiroldegia, eta ez zen giro berorik falta izan.

Amurizarekin batera, Oihane Bartra, Jone Uria eta Ibon Ajuriak eskuratu dute dagoeneko finalaurrekoetarako txartela, Mungiako, Balmasedako eta Aulestiko, hurrenez hurren, kanporaketetan nagusituta. Zuzenean pasatzeko bosgarren txartela hurrengo igandean erabakiko da, Getxon izango den bosgarren eta azken kanporaketan.

Jokatzeke da Xilaba txapelketako finala

Azaroaren 13an izango da aurtengo Xilaba, Xiberua, Lapurdi eta Baxe Nabarreko Bertsulari Xapelketako edizioaren finala. Donibane Lohitzuneko Jai-Alai frontoian izango da ekitaldia, 17:00tatik aurrera, eta Amets Arzallus, Sustrai Colina, Miren Artetxe, Eneritz Zabaleta, Ekhi Erremundegi, Xumai Murua, Odei Barroso eta Joanes Etxeberria bertsolariek hartuko dute parte. 

Amets Arzallus 2008ko txapelduna eta Euskal Herriko txapeldunordea da txapela janzteko faboritoa, baina ikusteke dago finalean gertatuko dena. Sarrerak salgai daude dagoeneko. 

Zibermedioak eta interaktibitatea

Honako sarrera honetan Berria, El País eta Clarín zibermedioen artean egindako konparaketaren ondorioak paratuko ditut, beti ere analisia medio hauek ikusentzuleentzako parte hartze eta interaktibitaterako eskaintzen dituzten aukerak kontuan hartuz. 


Lehenik eta behin esan beharra dago, lehenbiziko begiradan ohartu gaitezkela El Clarin zibermedio argentinarrak garrantzia gutxiago ematen diola parte hartzeari, batik bat horretarako espreski eskainitako atal identifikagarri bat ez duelako azaltzen bere atariko orrian, beste biek egiten duten moduan. Edonola ere, aurrera ikusiko dugun moduan badira ere El Clarin-ek interaktibitaterako eskaintzen dituen beste tresna batzuk. 


Interaktibitatea era orokorrean hartuta garatzeko tresnak eskaintzerako orduan nabarmentzen den medioa zein den erabaki beharko bagenuke, ziurrenik El País litzateke hori. Izan ere, beste biek ere eskaintzen dituzten aukeretaz gain - inkestak, iruzkinak egiteko aukera, albisteak partekatzea edota RSS jarioa - txata edota komunitateak sortzeko aukera ere eskaintzen du Madrilgo zibermedioak. Aukera horiek parte hartzerako tresnak jasotzeko Eskup atalean biltzen dira, baina hori bai, horra sartzeko ezinbestekoa da erregistratzea, izen abizenak eta bestelako datuak emanez. Beraz, zalantzan jarri beharko genuke El Paisek eskaintzen duena benetako parte hartze zuzena ote den. 


Berria-ren berezitasuna hain zuzen ere horixe da, hainbat tresna eskaintzen dituela, erregistratu gabe erabili daitezken hainbat tresna. Horien artean daukagu albisteak, bideoak edota argazkiak zuzenean bidaltzeko aukera. Clarinek ez du horrelakorik uzten, eta El Paisek, aitzina esan bezala, erregistratzeko baldintza jartzen du hori egin ahal izateko. 


Clarin medio argentinarra nabarmentzen duten gauzen artean era berezian destakatzen dute aktualitatearekin lotuta publikatutako edukien gaineko lehiaketak, joku horien bitartez informazioa eta entretenimendua uztartzen baititu. Era berean, harritzekoa da zibermedio honek albisteak partekatzeko betiko Twitter, Facebook edo Meneame bezalako tresnak eskaintzeaz gain beste 280 bat bide ere ematen dituela. 


Bukatzeko, eta ondorio moduan, esango nuke aztertutako hiru ziberkomunikabidek dauzkatela gabeziak eta puntu indartsuak interaktibitateari dagokionez. Parte hartzerako aukera integrala emateko, nire ustez, tresna ugari eskaintzeaz gain, tresna horiek eskura jarri behar zaizkio ikusentzuleari, era zuzenean eta erregistro edo horrelako mekanismorik erabili behar izan gabe erabili ahal izan ditzan.

Blogen analisia

Nire analisia egiteko elcorreo.com ziberkomunikabideko bost blog ezberdin erabili ditut. Lehenbiziko laurak Antonio Montilla, Fernando Pescador, Enrique Muller eta Fernando Iturribarria hedabideko munduko leku ezberdinetako korrespontsalenak dira. Bostgarrena, ordea, Tokion bizi den euskal herritar irakurle batena da, Oscar Diazena, "diaspora" izeneko blog kategorian integratuta. Edonola ere, elcorreo.com ziberkomunikabidearen blog bat erabilita, diseinu eta formatu aldetik oso antzekoak dira blog hau eta korrespontsalenak.

Edonola ere, edukien lanketan nabarmentzen da batez ere azken blog hau eta beste lauren arteko aldea. Korrespontsalen blogek aktualitezko gaiak lantzen dituzten bitartean - nahiz eta ironiaz eta askotan umorez landu - Oskar Diazen guneak bere bizitza pertsonalean egiten dituen ekintzei ematen dio tartea. Alde hori umorearen bitartez ere handitzen da, Oskar Diazek hizkuntza herritarragoa erabiltzen du, bere blogaren aurkezpenan ikus daiteken moduan. Aipatu beharra dago, gainera, bera eta Antonio Monilla direla blogaren aurkezpena egiten duten bakarrak.

Bestetik, nabarmentzeko da bost blogetan ematen den multimediaren erabilera eskasa. Argazkiak bai, denek erabiltzen dute baten bat- gutxi hala ere -, baina hortik haratago ezer ez. Fernando Iturribarriak sartzen du bideoren bat edo beste, baina besteetan ez dago holakorik, ez eta inolako loturarik ere, edukia bera aberastu zezaketenak.

Edonola ere, denek daukate postak saretzeko aukera - finean, plantilla bera erabiltzen dutelako -, eta komentarioak ere jasotzen dituzten, hamar bat batez bestez. Euren arteko lotura edo blogrolla ere badago, blog batetik ziberkomunikabide berako beste blogetara pasatzeko aukera ematen duena.

Milaka pertsona izan ziren Independentistak sareak Iruñean deitutako martxa berdean

Independentistak sarearen deialdiarekin bat eginez, milaka pertsona batu ziren asteartean, urriak 12, Iruñean izandako mobilizazioan. Euren artean, besteak beste, ezker abertzaleko, EAko, LABeko edota Sortzen Ikasbatuazeko kideak izan ziren. Hispanitate egunaren ospakizunari aurre eginez eta jai egun honen "izaera inperialista" salatuz, herrien independentzia ospatzeko eguntzat hartu zuten asteartekoa Iruñean bildutako lagunek. Era horretan, duela 200 urte Espainiatik independizatutako herri latinoamerikarrak presente izan zituzten mobilizazio osoan zehar eta asko izan ziren martxan, bandera eta guzti, parte hartu zuten latinoamerikar herritarrak.

Manifestazioaren ibilbidea amaituta Baluarte plazan izandako ekitaldian, Txutxi Ariznabarreta Independentistak sareko kideak herri latinoamerikarrak euren independentziagatik zoriondu eta martxan parte hartzeagatik eskerrak eman ostean, Euskal Herrirako aukera egokiena bezala defendatu zuen ere independentzia, txalo artean. Bestalde, 1805ean Roman Simon Bolivar askatzaileak egindako juramentua eta horren euskal bertsioa irakurri zuten sareko beste bi kidek. Mobilizazioari dantza latinoamerikarren erakustaldiarekin eman zitzaion amaiera. 

Sakatu Simon Bolivarren juramentuaren irakurketaren bideoa ikusteko

Entzun ezazu Txutxi Ariznabarretaren interbentzio osoa

Click To Play

Aurrera darrai Xiberoa, Lapurdi eta Baxe Nabarreko Bertsulari Xapelketak

Irailaren 18an Muskildin (Xiberoa) hasitako Xiberoa, Lapurdi eta Baxe Nabarreko Bertsulari Xapelketak aurrera darrai. Hogei bertsolarik hartu dute parte azaroaren 13an Donibane Lohitzunen amaiera izango duen txapelketaren edizio honetan. Orain arte jokatutako hiru kanporaketetan, Odei Barroso, Kristiñe Txoperena eta Eneritz Zabaleta izan dira onenak. Horiekin batera beste bederatzi bertsolarik -tartean, Amets Arzallus eta Sustrai Colina, zuzenean sailkatuak- hartuko dute parte urriaren 16an eta 23an, Luhuson eta Gabadin (Baxe Nabarre) hurrenez hurren jokatu diren finalaurrekotan, final handira sailkatzeko helburuz.


Aurtengo edizioaren spota: 


info+: Xilaba

Bertsolaritzaz mintzo "geure hitzak" blogean

"Geure hitzak" bloga multimedia masterraren inguruko lan eta edukietaz hitz egiteko sortua bada ere, bertsolaritzaz luze eta zabal hitz egiteko aukera ere izango dugu, gai horri eskainitako orrialdearen bitartez.

Esan, berriz esan

Geure hitzak esan eta berriz esan ahal izateko aukera ematen digu multimediak. Jada ez da ahots urratu bat, garraxi zoro bat soilik. Denon bihotzean geratu zaigun kantu zorrotz horretatik haratago goaz. Orain, geure hitzak, neure hitzak behin eta berriro esan eta horma honetan luzaroan iltzatzeko aukera daukat. Kantuek, soinuek, irudiek, testuek ez dute ihes egiterik. Behin betiko zabaltzeko aukera eman die multimediak. Handikiei aurre egiteko tresna luzatu digu, gu ere hemen bagarela esateko, gure txokoak baliatu ditzazkegula argi izateko, gure mezuak zabaltzeko. Hau da nire tresna, nire bloga, nire lanak paratzeko erabiliko dudan horma. Finean, nire hitzak zabaltzeko erabiliko dudan kantua.